最近澳洲悉尼同新南威爾士州（NSW）多個地方，出現咗大批博貢蛾（Bogong moth），窗邊、屋簷、車尾箱嘅罅隙，全部都有佢哋嘅蹤影。貝特曼斯灣（Batemans Bay）街坊Reina Hill話，家中突然湧入大量飛蛾，出到門口就有一大群迎面飛埋過嚟，露台底同屋簷邊緣都堆滿咗。彭里斯（Penrith）同 Malua Bay 嘅居民都影到私家車尾箱罅塞滿密密麻麻嘅飛蛾，畫面幾震撼。
最抵死嘅係：呢啲蟲唔係普通害蟲，而係瀕危物種。澳洲當地市議會已經出聲，籲居民唔好恐慌，唔好用殺蟲劑或者隨意打死佢哋；如果有飛蛾飛入屋，建議倒扣杯子罩住，再用薄紙板輕輕帶到室外放走。呢一聽就好似同你講「家俾蟑螂入咗，唔好殺佢，幫佢揾個 comfortable 嘅地方」。
專家話，呢啲飛蛾正進行每年春季嘅大遷徙，目的地係澳洲東南部高山，整個旅程可以長達約1,000公里，靠地磁場同夜空線索導航。悉尼大學生物學家 Dieter Hochuli 話，居民眼中嘅「入侵」，其實係飛蛾日間尋找縫隙躲避鳥類嘅自然行為。而今年沿海城市特別見到大批蛾群，主因係城市燈光干擾咗佢哋導航，加上近期強風將飛蛾吹離遷徙路線，令更多飛蛾聚集喺沿岸一帶；具体情況仍有待研究。
再補一刀：博貢蛾喺2021年被國際自然保護聯盟（IUCN）列為瀕危物種，之前受乾重創，數量曾暴跌99.5%。今年大量出現，專家認為可能係族群恢復嘅正面訊號；維多利亞動物園機構（Zoos Victoria）高級保育生物學家 Marissa Parrott 話今年係博貢蛾近10年表現最好嘅一年，惟局部大量出現不等於全物種已擺脱威脅。
姣姐講多句：悉尼人呢陣時大概正處於「想殺但又唔敢殺」嘅軍備競賽，車尾箱開到一半都唔知點算。市議會建議平日關掉不必要嘅燈光，減少干擾。希望呢啲飛蛾順利完成任務，悉尼街坊平安過夏。
黃姣姐整合｜頂硬上
