美國同伊朗衝突持續，德黑蘭北部高檔社區嘅塔吉里什廣場（Tajrish Square）高處，突然出現一件「3D藝術裝置」：一名演員扮美國總統特朗普，困喺鐵牢入面做囚犯。
呢位冒牌「監躉」身穿深色西裝、繫紅領呔，戴住特製特朗普面具，時而喺鐵牢入面來回踱步，時而搖欄露出苦惱表情，有時仲跳起特朗普標誌式「Y.M.C.A.」舞蹈，嘅色真係有幾分神韻。
裝置旁邊仲有一塊銀幕，上面顯示譴責美國犯下戰爭罪行嘅內容，另有一行大字：「對這一幕視而不見，即是犯罪。」句力夠重，不過用喺自家首都嘅廣場，就幾耐人尋味。
報道稱呢次表演由德黑蘭市政府「城市美化組織」策劃，為期15日，官方説法係「提醒居民伊朗正尋求實現正義」。聽落好似藝術節，睇落就好似官方大型宣傳。
當地民眾反應唔錯，不少路人駐足拍攝，亦有人趁機對特朗普破口大罵，氣氛好似茶餐廳茶客吹水——見到乜都想講兩句。
硬蕉抽兩句：威權國家對自家人民嘅嘴閉到實，對外國領袖卻敢做鐵牢藝術裝置。同一雙眼，睇自己人係威脅，睇特朗普就係素材。呢個才係真正嘅「視而不見」——睇自己人。
硬蕉哥整合｜頂硬上
