各位深夜未瞓嘅朋友，硬蕉哥要同你哋講一個可能改變你對八腳朋友認知嘅發現。
德國波昂大學（University of Bonn）研究團隊近日發表研究，觀察澳洲一種跳蛛（Portia fimbriata），發現佢哋嘅睡眠同人類一樣，分成兩個不同階段。
研究人員將跳蛛放進直徑12公分嘅容器，用紅外線攝影機連續錄下幾日活動，再用聲音同睡眠干擾實驗觀察佢哋反應。結果發現，其中一個睡眠階段同人類嘅快速動眼期（REM）非常相似——蜘蛛喺呢個階段會出現眼瞼轉動同肌肉抽動，就好似我哋瞓到一半突然扭身。
圖片：Mackensen／Public domain／Wikimedia Commons
更搞笑嘅係，蜘蛛被驚醒後，會在接下來嘅休息時間補眠，證明佢哋唔係單純停機，而係有實際嘅生理睡眠需求。
不過科學家講，出現類似REM行為唔代表蜘蛛一定會做夢。研究未直接測量蜘蛛腦部活動，目前仍無法確認佢哋有冇同人類相同嘅睡眠機制。
研究人員下一步想研究蜘蛛睡眠同學習、記憶嘅關係，以及夜間人工照明會唔會影響佢哋作息。
硬蕉抽兩句：講真，如果蜘蛛真係同我哋一樣分階段瞓覺、會扭身、被驚醒要補覺，咁佢哋做唔會做夢，實係一個好值得深究嘅問題。諗起成日見佢哋掛喺屋簷，成日瞓到瞓醒，突然覺得佢哋都有自己嘅小宇宙。
