近日，一段影片喺內地網絡流傳：一件寫住「天堂電視」嘅紙紮祭品，正面赫然印上了已故喜劇演員高秀敏同資深演員張少華嘅生前劇照，仲模擬咗電視機播放畫面嘅效果。呢件祭品據指係在市場上流傳嘅殯葬用品，部分商家將電視劇截圖製成模版，大量印製銷售牟利。
經網民比對，「天堂電視」屏幕上嘅圖像，截取自內地劇集《半路夫妻》嘅高秀敏劇照。事件曝光後喺社交平台掀起爭議，不少網民痛斥商家缺乏道德底線、對逝者不敬。據拍攝者透露，短片係早前在參與葬禮時偶然發現，該件祭品在市面已存在一段時間。
高秀敏生於吉林，曾同趙本山、范偉組成中央電視台春節聯歡晚會嘅經典喜劇「鐵三角」，代表作包括《賣拐》、《賣車》等，2005年8月因心臟病喺長春離世，終年46歲。同被印上嘅張少華，係資深電視演員，曾出演《大宅門》、《我的醜娘》，2021年3月病逝，享年75歲。
圖片：Tbatb／CC BY-SA 4.0／Wikimedia Commons
河南澤槿律師事務所律師付建指出，根據《中華人民共和國民法典》第994條，自然人死亡後，姓名、肖像、名譽、榮譽、隱私及遺體等人格利益依然受保護。未經近親屬許可將可識別逝者肖像印在祭祀用品上作商業銷售，侵犯死者肖像利益並背離公序良俗，近親屬有權入稟要求停止生產銷售、公開賠禮道歉及賠償精神損害。
姣姐講多句 講真，紙紮文化本身係中國人送後人上路嘅傳統，燒電視、燒手機、燒大樓都係「盡孝」嘅心意，唔成問題。但將一位深受觀眾喜愛嘅笑星劇照，當「素材」印喺燒嗿嗿嘅冥具上牟利，就係另一回事。人走了，但肖像權、人格利益未同佢一齊燒埋，法律都寫得清清楚楚。商家貪方便、貪吸引眼球咁做，最後消費嘅係逝者嘅尊嚴，同埋萬千觀眾嘅感情。
（成人題材｜18+ 以上內容只涉及產業與文化評論，無露骨描寫。）
黃姣姐整合｜頂硬上
