新加坡後港中心第811座一間手機店，10月20日下午約1時，發生咗一宗「明目張膽」嘅iPhone搶奪案。
閉路電視錄到，一名20多歲白衣男子，左手臂滿布紋身，全程戴住頭盔掩飾身份，好禮貌咁入店要求「睇下」部 iPhone 17 Pro Max。
部價值近2,000新加坡元（約1.22萬港元）嘅手機一上手，佢即刻拔腿奪門而出。
三個店員見狀追出，搜遍附近商場、巴士站、地鐵站，仲有人入去商場洗手間搜，前後狂追約15分鐘。期間一名店員一度攞到疑犯揹包，被對方發力掙脱，仲拉傷咗背部肌肉。
店員之後表示：「跑到氣喘，都沒能抓到男子。」
最終途人話目擊過疑犯騎電動單車離開，案件仍在調查中。店舖營業超過5年，係第一次遇到呢類事。經此事，店員話而家拿機畀客睇都特別留意對方舉動。
姣姐講多句： 三個店員追一個成年男追足15分鐘都追唔住，好似茶餐廳見飛單追出去，追到氣喘喘但人喺邊根本揾唔到。最搞笑係佢哋仲入去洗手間搜，新加坡嗰啲頭盔仔都唔怕呢招。手機近1.2萬蚊，新加坡治安好到好似冇呢件事發生，但個店員拉傷背就係真金白銀嘅代價。
黃姣姐整合｜頂硬上
