一個幾十塊錢嘅茶點，近日突然搞成台海網民戰場。日前一名台灣 YouTuber「放火」到台中逢甲夜市直播，喺一個叫「菠蘿先生」嘅攤位買嘢食，點知店員突然聲稱菠蘿包同凍檸茶都係源自台灣，仲話傳到香港之後先被人改名。
「放火」當時對住鏡頭只尷尬接咗句：「呃……我……我不好説。這明天上連登。」點知呢段片段一出，即刻喺香港網絡全面發酵。
有網民吐槽「剛偷完雞蛋仔，現在又偷菠蘿包凍檸茶」，又有話「偷了十年菠蘿包就説是自己國家的」，字字扎心。不過都唔少台灣網民主動出頭澄清，話港式凍檸茶有檸檬片、可調酸度，切開菠蘿包夾牛油都係香港特色，更直言「台灣有這種人出來亂講話，只是想讓你們知道台灣還是有很多正常人的」。
事件越鬧越大，「菠蘿先生」店方終於發文道歉，承認香港菠蘿包同凍檸茶有較早發展歷史，仲稱香港係「值得尊重的文化原創者」，話自己原意只係表達對台灣傳統麵包嘅感情，並非否定其他文化，最後就直播中「表達不周」同受冒犯嘅香港朋友逐一致歉。
其實呢種「菠蘿包之亂」並非首次。2021 年日本連鎖食肆 Wendy's 推廣亞洲美食，就誤將港式「菠蘿油」標做「台灣名物」，惹到香港文化界同網民集體發聲，要求為菠蘿包取回「香港身份」，最後仲要發公開聲明澄清道歉。
仲有個更離譜嘅：據悉「菠蘿包」過去一度被考慮做颱風名。前天文台台長岑智明就解釋，呢種食物形象太鮮明，若見於「強烈颱風菠蘿包正面吹襲」咁嘅新聞，市民真係會當警報係玩笑，所以最終冇獲選入官方名單。
一件茶餐廳嘅招牌酥皮包，究竟係點搞成跨海文化戰嘅？
姣姐講多句
講真，呢場戰最荒謬嘅唔係「邊個發明」，係兩個地方嘅網民為一個麵包吵到面紅耳赤，最後仲要商家出面道歉收場。菠蘿包係 2014 年被列入《香港非物質文化遺產資料庫》嘅文化資產，地位同「無風吹襲」嘅颱風名一樣尷尬又好笑。
茶餐廳嘅嘢，最理想就係坐低食、唔多講。下次直播之前，記得把嘴封實啲先。
黃姣姐整合｜頂硬上
