北上消費早唔止食同買嘢，而家甚至體檢都北上搞。近日有女網民喺 Facebook 群組「深圳吃喝玩樂資訊關注組」匿名爆自己第2次喺深圳一間醫療機構驗身，話只花約2,000元人民幣（約2,300港元），就做完電腦斷層掃描（CT）、磁力共振（MRI）同超聲波，仲有識講廣東話嘅醫生逐項解釋報告。
佢將兩地擺落埋一齊比：「公立醫院排幾年都做唔到，私家醫院無1至2萬蚊都做唔到，真係唔Check唔知身體好。」該間機構仲開咗 WhatsApp 群組、設客户服務中心，「全程有人帶住」，唔使自己逐項跑。
不過呢個帖好多網民一眼就睇穿係廣告，紛紛留言話會私訊樓主。樓主最後真係喺帖文貼出 WhatsApp 連結同優惠碼，笑言「你哋太踴躍啦，唯有放喺帖文下」、「我覆到手軟，你哋自己加入啦」，仲話用優惠碼可以再慳400元。
然而一輪「幾抵」之後，大量網民轉頭提聲風險。有留言話「正正經經買份醫保同意外保仲好啦」，又有話「平還平，但出咗咩事，香港份保險未必受理」。
呢個擔心唔係白説。根據香港消費者委員會2025年公佈嘅旅遊保險調查，市面旅遊保險嘅醫療費用保障，主要針對受保人喺旅途中意外受傷或患病所產生嘅診症、住院同治療開支，並非所有喺境外接受嘅醫療服務都獲賠償。假如專程去深圳做預先安排嘅體檢，相關費用一般唔喺普通旅遊保險嘅保障範圍內；檢查過程若出現過敏反應、併發症或醫療事故，有關急症治療、住院或轉院費用是否受保，要視乎保單除外責任同具體情況，唔好以為買咗旅遊保險就穩陣。就算係個人醫療保險，即使涵蓋 CT、MRI 等診斷影像，亦可能設有醫療必要性、地區、指定醫療機構等索償限制。
除咗保險，消委會亦提醒低價體檢背後嘅銷售手法：過往曾接獲投訴，有醫療中心以免費或低價檢查吸引顧客，其後涉嫌誇大病情、游説購買額外療程，其中一宗個案，消費者遭持續推銷其他療程，10個月累計花費超過15萬元。消委會話，體檢唔應該只睇項目多寡或優惠幅度，應由醫生評估個人健康風險；而無症狀人士有冇需要做 CT、MRI 等大型儀器檢查，亦要按年齡、病歷、家族病史同臨床需要決定，唔係因為套餐包就全接受。
姣姐講多句：¥2,000 包埋 CT 連 MRI，單睇價碼係幾心動，但體檢唔係買手機，唔係「平」就穩陣。真係想揾平，預約前記得向保險公司書面確認境外體檢同潛在併發症是否受保，同時核實該醫療機構嘅執業資格同緊急處理安排；收據、報告同醫療紀錄全部保留好，出事先有得跟。抵唔抵，唔止睇個價，仲要睇出事邊個兜底。
黃姣姐整合｜頂硬上
