近日內地社交平台小紅書一篇題為「便宜但可能致癌的小東西」嘅帖文爆紅，吸引近6萬人讚好、逾9,000個留言，將平價手機殼、牙線、超市收據、廉價女裝逐一點名。有人驚呼「我買了好多，用了好久了」，亦有人感嘆「感覺窮人沒活路了，都是致癌的」，討論延伸到刷牙杯、木筷子、瑜伽墊，甚至廁所清潔劑。
手機殼係今次討論入面最嚇人嘅樣本。深圳市消委會2018年比較試驗發現，30款手機殼中有5款有害化學物質超標，其中一款鑲水鑽嘅「躍寧」手機殼，水鑽部分鉛含量達155,000ppm，超出所參考限值1,550倍。浙江省市場監督管理局過往對20款手機殼做風險監測，亦有低價樣本鉛含量超出所參考限值30倍。
牙線問題出喺部分產品採用聚四氟乙烯（PTFE），即俗稱「特氟龍」，屬廣義PFAS「永久化學物」。Silent Spring Institute 2019年研究分析178名女性血液樣本，發現使用某款牙線者體內一種PFAS物質濃度較高；但2025年刊於《Journal of Clinical Periodontology》對6,750名美國成年人嘅研究，只發現使用者PFOA略高，整體6種PFAS指標反而較低，未能證明牙線係直接來源。美國牙醫學會仍建議每日清潔牙縫，對PFAS有顧慮者可揀「PFAS-Free」款式。
超市收據方面，部分熱敏紙以雙酚A（BPA）作顯色劑。2014年《PLOS ONE》研究指出，使用含滲透促進成分嘅搓手液後再即時接觸含BPA熱敏紙並徒手進食，BPA會轉移到雙手及食物，血液及尿液BPA水平隨之上升。歐盟自2020年起已限制熱敏紙使用BPA，市面亦有其他顯色技術，唔等同一張張收據都係毒。
衣物方面，香港消委會《選擇》月刊第571期曾檢出30款嬰幼兒衣物中1款游離甲醛32.3mg/kg，超出內地標準上限20mg/kg。消委會指出甲醛殘留可以透過洗濯減少，新衣尤其是BB衫，穿前應先洗一次。
姣姐講多句：帖文嘅數據同研究都有出處，但「平價=致癌」呢個等號真係唔成立。2018年嗰個超標手機殼樣本唔代表而家街邊幾蚊十蚊嘅貨都係同樣貨色。專家建議「一聞二看三摸」：拆封有刺鼻橡膠或化學香精味就退；唔揀無生產資訊嘅「三無產品」；閃粉水鑽愈花巧愈高危；優質矽膠應該乾爽，觸感黏膩、折到起白痕掉粉，極可能係高毒再生廢料。有網民反酸：「沒事大家熬的夜比這有毒多了」、「大家上的班也比這些有毒多了」，講得真係幾真實。買嘢看標識、睇成分，莫因為「平」就照單全收。
黃姣姐整合｜頂硬上
