有公屋住户10月17日喺Facebook「公屋討論區」貼出房委會「配房通知信」，指自己三派終於派到「心水單位」，又得同父母住同一座，帖文引來網民熱議，留言話「同父母住埋同一座，真係好過中六合彩呀」。
呢位樓主由一派起計約5個月，「一派東涌（太遠），二派石圍角二樓」，到10月中三派終獲派荃灣梨木樹邨一個約235呎嘅2至3人單位，每月租金2,253元。佢話自己申請時有填「照顧父母」，見社工後房屋署指定就近父母嘅6個地點，「好幸運派咗同一條邨同一座」，仲特別感謝二派時幫佢出意見嘅網民朋友。
梨木樹邨雖最舊樓齡超過50年，卻一直被公屋輪候人士視為「隱形筍盤」：社區發展成熟、有商場街市、多條巴士小巴直達市區，加上舊式公屋實用率較高，喺輪候人士眼中唔比新屋差。
網民留言笑言「派返同邨已經唔易！派埋同一棟簡直絕無僅有」，仲有人話「恭喜恭喜！可能孝感動天！」。對成日打緊工、輪候輪到心碎嘅港人嚟講，呢啲大概就係最真實版嘅中獎喜劇。
姣姐講多句
公屋配房靠抽籤，咪同中六合彩一樣，靠天公作美。但呢位友仔就係好彩「心水」抽中，又抽中同父母同一座——呢運氣，打幾份工都未必有。
黃姣姐整合｜頂硬上
