乒乓球奧運金牌得主樊振東21日喺社交平台發文，公開炮轟「代拍」同「偷拍」行為。佢開篇引用「施諸己而不願，亦勿施於人」，一句「真的有人願意被偷拍嗎？」直接拋落，話無論偷拍者係邊個、有咩目的，都掩飾唔到侵犯私隱嘅本質。條貼文一出，即登頂微博熱搜第一位。
佢特別分釐「善意」同「越界」。樊振東話，有禮貌同 respet 嘅球迷或路人並唔會舉住部機開住鏡頭打招呼，對於呢類朋友佢一直樂於回應；但邊拍邊喊話、想靠近嘅人，就真係分辨唔到對方係支持者，定係開自媒體揾流量嘅人。佢話：「邊界感強不等同於冷漠，敬人者，人恆敬之。」
呢並非樊振東首次就私隱受侵公開作聲。資料顯示，2023年4月曾有1名女性追隨者非法取得房卡闖入佢酒店房間，逼佢報警；2024年3月，佢嘅身份證號碼等個人資料更遭人喺網絡惡意散佈，家人電話反覆受騷擾，當時佢已警告「互聯網非法外之地」。
國乒另一名將孫穎莎此前亦透過官方球迷會聲明，不舉辦、不參與、不授權任何形式嘅生日應援活動，顯示頂尖運動員正集體同「飯圈化」劃清界線。
發聲之後，網民同球迷大多數支持，自發呼號「賽場見」，呼籲離運動員生活遠啲、離賽場近啲。日前喺廣州一場線下活動，數千名球迷高度自律，現場冇出現圍堵同近距離對臉拍攝。
姣姐講多句：偷拍呢樣嘢，好多人當係「支持」、當係「愛」，但事實就係偷，人哋冇授權、冇同意。手機唔係入屋嘅鑰匙，鏡頭亦唔係公器。當公眾人物敢於開口講「唔」，唔係同世界作對，係同自己嘅私隱權站一起。私隱從來唔係流量嘅耗材。
黃姣姐整合｜頂硬上
