內地連鎖超市「胖東來」又再證明：唔係每家店都話「顧客永遠是對的」。
8月下旬至9月初，胖東來接連接獲3宗前線員工遇襲事件，合共5名員工執勤期間被顧客勒頸、掌摑頭部及連番辱罵。公司嘅反應唔係叫佢哋「忍一忍」，而係向受害員工派發合共人民幣7萬元（約8.23萬港元）嘅「委屈補償金」，同時由法務部門正式入稟法院，追究施暴顧客嘅民事責任。
三宗事件分別發生喺：8月22日新鄉分店，顧客王某強闖人流管制閘口，推撞並勒住員工頸部，該員工獲補償人民幣2萬元；翌日許昌分店，兼職員工周某核對貨單時遭顧客張某掌摑頭部，上前勸阻嘅保安劉某亦被推撞，二人分別獲人民幣2萬及1萬元補償；9月3日許昌勞動路分店，顧客李某付款時企圖插隊，被收銀員禮貌提醒後惱羞成怒，當場辱罵收銀員及趕到嘅主管丁某，二人各獲人民幣1萬元補償。
資料圖片：Pixabay
涉事3名顧客除被當地警方以擾亂公共場所秩序、故意傷害及公然侮辱等罪名處以行政罰款外，王某同張更被永久列入商場黑名單、取消會員資格並禁止進場。
呢套「委屈獎」制度並非臨時起意。胖東來自2023年起已訂立《侵犯人格尊嚴處理及補償標準》，僅2025年首10個月已處理33宗同類案件，累計發放補償金人民幣35.9萬元（約42.2萬港元）。
姣姐講多句：港企邊個唔識「忍一忍當幫公司做生意」？被大佬客當街打落隻鐘，HR第一句「呢個係公司形象，你忍下」。胖東來倒好，打人一掌，公司開支票、請律師、列黑名單，一步過。零售業分析指呢套機制靠單店高利潤支撐，毛利微薄嘅傳統超市根本無本錢跟——但問題係，跟唔跟得起，係另一回事。
黃姣姐整合｜頂硬上
