澳洲新南威州議會週三（10月21日）通過咗澳洲首個「人體堆肥」（human composting）法例，喺土葬同火化之外，死者同家屬終於有多咗一個合法選擇。最離譜嘅係，表決通過嗰陣，好幾個在任州議員公開發聲話想死後用呢個新方法。
所謂「人體堆肥」，醫學名叫做自然有機還原（natural organic reduction），又叫做 terramation。做法係將屍體放入一個温度控制嘅容器中，加入苜蓿草、稻草等有機物，再搖動容器令空氣流通，靠體內微生物分解。呢個做法喺德國同美國部分地區已經合法，獨立悉尼議員 Alex Greenwich 專程去呢兩地考察，先提出私人法案。
自由意志黨（Libertarian）議員 John Ruddick 喺上院話：「我十分肯定會喺遺囑寫明我想做 terramation。我喜歡被埋喺某個地方，睇一棵大樹喺嗰度生長一百年嘅畫面。火化或者土葬從來都令我好唔自在，呢個係好得嘅選擇。」
工黨議員 Cameron Murphy 亦話：「我期待喺遙遠未來、呢法例成為法律之後，能夠使用呢項服務。」
自由黨議員 Susan Carter 則提醒政府，執行時要確保對逝者嘅尊重：「Terramation 唔應該簡單變成一個人體堆肥桶。」
動物正義黨議員、該法案喺上院嘅提出者 Emma Hurst 強調環境效益：避免大片墓地、碳排放中性，而火化耗能高、排放大量温室氣體。佢話呢過程「自然而温和」，家屬可以喺期間探視，都有多個儀式機會。
法例通過後，新南威政府有18個月時間制定相關規例，限制喺專門設施進行。
硬蕉抽兩句：「入土為安」呢個成語，喺新南威而家真係變成「入土發酵」——落土生根，字面意思，種埋棵樹喺度。連政客都搶住做第一隊「人肥」，連遺囑都寫好，選擇自由原來連死法都包晒。
硬蕉哥整合｜頂硬上
