10月26日上午，一艘停泊喺柬埔寨Sihanoukville（西哈努克港）嘅郵輪，突然通知船上一班買咗「永久」住處嘅居民：即刻下船。
營運方Villa Vie Residences喺聲明入面解釋：中東戰事令霍爾木茲海峽受阻，油價急升，每間船艙每個月燃油開支由歷史平均$1,800飆至亞洲部分地區嘅$6,000–$8,000。「公司無法將呢種幅度嘅上漲轉嫁予居民」，聲明寫道，「已無力繼續承擔經營虧損。」公司稱已試過減速、多留岸港，但唔夠。
69歲嘅Carol Larson，喺船上住咗18個月，買船艙$120,000分期償付。佢話唔後悔。「我覺得自己好幸運，能成為居住式郵輪實驗的一部分。」
Wyoming嘅退休夫婦Paul同Lynn Montoya，喺船上17個月，批評航線反覆改動、網絡差、餐食質量下降，仲話公司每兩至四個星期就要佢哋出油錢，「我哋對呢種模式好疲累。」
一位喺船上生活嘅部落格作者Cassingham寫道：「呢啲並唔係無緣無故。問題係層層堆疊——由商業模式、管理失誤，到燃油成本與供應危機。」
有網民喺社交平台留低一句：「簽嘢之前睇清楚細則，根本冇『永久郵輪』呢回事。」
硬蕉抽兩句：個荒謬唔係油價，亦唔係地緣政治，係「永久」兩個字。買家賣咗屋、簽咗約、以為自己買咗一個可以環遊世界嘅家；賣家賣嘅，不過係一個會隨油價跳動嘅、隨時會熄燈嘅商業模式。邊個喺合約細則寫低「如地緣政治惡化，船可隨時開唔到」？細則寫咗無？我估唔到你寫到。
硬蕉哥整合｜頂硬上
