近日 Threads 瘋傳多段港鐵港島綫短片：一名大媽喺車廂內情緒激動，極高分貝爆粗指罵，大叫「死窮鬼」、「垃圾」、「乞兒」。片段最搞笑位？嗰個被指罵嘅年輕男生，全程毫無愠色，最後仲「影帝上身」，笑到全車乘客笑爆，更紅到日本。
嗰陣事係咁：大媽最初無故狂罵一對同行母子，母子不知所措未敢反擊。穿休閒服嘅男生見狀，舉手擋喺大媽同母子之間，主動引開火力，自己反成目標。
跟住就係嗰個「用魔法打敗魔法」嘅名場面。大媽連環挑釁，男生平靜問：「你邊度落車？」大媽：「關你鬼事呀？」男生笑言：「我驚我陣間同唔到你講嘢呀！」大媽揚言要跟到金鐘並狂罵「死乞兒」，男生突發奇想，面容扭曲假裝全身抽筋，搞到全車人爆笑。大媽再用普通話吼「你這個垃圾！你有什麼本事？」，男生冇正面爭辯，反而逐句配合動作複述，嗰一刻車廂氣氛完全被「翻轉」。
事後男生喺 Threads 現身交代始末：見小朋友無辜被罵先出手，「全程平靜冇受傷」，仲禮貌為車廂騷動向其他乘客致歉。佢仲透露到金鐘站後大媽仍拿小風扇揚言砸手機，但月台上獲保護嘅男童，笑住對鏡頭比出「勝利V字」手勢致謝。
片段之後被轉載至日本社交平台 X，吸引數以千萬瀏覽量，日本網民洗版大讚。向來講求「讀空氣」、極度注重公共秩序嘅日網，呢次真係服了：「這男生的從容笑容太帥了」、「沉著冷靜的心態真的很重要，年紀輕輕就如此了不起」。有網民更幽默推測：「大媽內心絕對也覺得他挺帥的，如果換作對方是女生，場面肯定會更加失控」。
「被人近距離用手指著眼睛既危險又惹火，他竟然全盤忍下還能輕鬆化解，EQ真的頂級」——呢句日本網民留言，大概就係對「高EQ」最強嘅註解。「周圍所有人只顧著看，只有他果斷站了出來，這種舉動真心令人尊敬！」
姣姐講多句：呢個片最難得唔係「反擊」得幾狠，而係佢用一個笑容、幾招「影帝上身」，把一場本來好兇險嘅衝突化成笑話。全車人最易做嘅係睇住，佢做嘅係站出嚟。日本網民都講：「看見香港人素質這麼高很欣慰」——呢次唔洗客氣，係事實。香港仔仔，真係幾叻。
黃姣姐整合｜頂硬上
