有住喺歐洲嘅港人近日喺Threads發帖大呻，話佢位年過60歲嘅母親，自數月前喺社交平台接觸到內地AI短劇之後，就好似吸毒咁「沉迷咗落去」，每天起床頭件事到瞓覺前，全部時間都畀AI短劇佔領，最誇張時每日高達15個鐘。
「出街飲茶食飯、煮緊早餐煮緊晚餐、洗緊衫、屙X都要繼續睇」，呢個係帖文對佢老母日常嘅直白描述。最誇張係佢老母戴住嘅耳機「好似助聽器咁，永遠都除唔到落嚟」，甚至明知樓主喺度開口講嘢，都只係「岷頭就當回應咗」。
樓主話佢已經同老母解釋過多次，長期看呢啲被形容為「精神鴉片」嘅AI微短劇，有機會影響健康同思想，但對方「完全停唔到落去」，明知劇情「重複又重複」、演員都係常見嘅AI面孔，都戒唔到。
帖文一發，引來極大迴響，大量網民都指自家老豆老母、長輩都有類似情況，甚至為看劇而廢寢忘餐，樓主不禁慨嘆「原來大家嘅老豆老X都係咁」。
面對呢個潮水，有網民出招「戒癮」：喺屋企Wi-Fi設定限速，令佢「睇10秒load 5秒」；定期用佢個帳號對AI片按「不感興趣」、Block埋個啲AI劇page；或者帶佢去長者中心參加活動、建立手機以外嘅興趣。亦有理性派話唔好介入太多，「佢沉迷呢啲都係想逃離現實，等於我得閒就會去打機一樣，咁我就唔介入別人嘅因果了」。
呢啲AI短劇嘅賣點，就係呢啲「窮小子逆襲一夜致富」類型嘅劇本——網民分析背後其實係「身份焦慮」，加上「現實嘅無力感同階層嘅不安感」，所以好想睇到「逆襲打臉」呢啲劇情「即時爽一爽」。
成件事真正驚人嘅地方，唔止係個體沉迷，而係呢個產業本身：「對AI臉感到不舒服」相關討論近期登上內地社群平台熱搜；普通人單張照片可以賣約100人民幣授權，半個鐘內搞掂，平台再技術處理成「數字形象包」配任何劇本。連女星戚薇都成為中國娛樂圈第一位授權製作個人AI分身短劇嘅藝人，不過佢部AI漫劇《末日盛夏》宣傳片因為低角度「裙下仰拍」、鏡頭卡點停頓喺裙底而「翻車」，被指充斥「偷窺感」，網民群起炮轟。
AI短劇已唔再係「科技玩具」，而係一門高速擴張、有肖像權交易、有倫理爭議嘅新內容業態。今日佢哋嘅老豆老母煲緊「逆襲打臉劇」，明日就係另一班人煲住AI合成內容睇到停唔落。
姣姐講多句：呢件事最諷刺嘅位，係佢哋上一代最恨我哋「打機無魂」，而家輪到佢哋自己「煲劇無魂」。AI短劇就係成年人世界嘅「精神鴉片」，任何靠多巴胺堆砌嘅即時滿足內容都係同類。阿媽日煲15個鐘，仔女應該「幫佢戒」定「由佢爆」？呢個問題，恐怕係呢個「AI時代」我哋每個家庭都無可避免要面對嘅。
黃姣姐整合｜頂硬上
