舞台劇《見面即地獄》喺海洋公園「哈囉喂」搞快閃見面會，觀眾為贏門票上演各種死狀，場面瘋狂，Dee更揭自己昔日喺海洋公園鬼屋扮惡鬼、拿過最佳鬼屋獎的舊事。
《見面即地獄》由陳湛文(Peter)、Dee@ERROR、李佳芯(Ali)同劉漪琳(Eliz)主演，12月11日至26日喺香港演藝學院上演。早前喺海洋公園「哈囉喂」尾聲，四人搞咗兩場15分鐘快閃見面會，與現場粉絲大玩地獄級互動。
四人先逐一介紹自己角色「最地獄之處」。陳湛文話自己嘅阿白係「時間管理達人」，要幫人處理一條屍體；Dee笑言阿明「只不過是殺了人，然後叫兄弟幫手處理啫」；李佳芯大爆自己飾演的記者Winnie「竟然是Peter、阿Dee當中，其中一位的情婦」，令人無限猜想；劉漪琳就話自己飾演嘅情情，最特別就係「一切嘅地獄就係由我開始」。
最爆笑要數監製兼主持陳詠燊出嘅情境題：「如果你收到一個電話，你最好嘅朋友殺咗人，叫你去救佢甩身，你會點做？」陳湛文、Dee、李佳芯三位不約而同，明明白白選「報警！」，完全割席自保；唯獨劉漪琳玩味建議：「會叫佢打畀Peter⋯⋯點解就要入場先知！」
快閃會後段，四位主演邀觀眾上台「扮死屍」贏門票，死狀五花八門，有中槍、有喪屍，連釘十字架都有。最博掌聲嘅，係同Dee合作嘅一位觀眾，喺前方做後拱橋，Dee喺後方配合做「扮死」表情，當場贏走全場，即送《見面即地獄》門票兩張。
呢晚仲有一幕暖場。Dee原來曾喺海洋公園做過舞蹈員，並於「哈囉喂」鬼屋扮惡鬼，與同事想出最驚嚇嘅嚇人方法，那一年拿走最佳鬼屋獎。是晚Dee喺場內遊走，重遇當年一齊合作嘅舊同事，滿場相見擁抱，一片窩心。
姣姐講多句，呢場快閃會最正係個「死」字：有觀眾真係瞓落地假死，有演員真係扮鬼扮到拿過獎，同一個地獄夜晚同時發生，荒啲都荒到齊人。想睇真人版屍體處理，12月嘅戲唔使等。
