內地坐擁逾百萬粉絲的帥氣男網紅「樂仔Levi」爆出大波感情醜聞。同佢相戀4年嘅女友「熙熙」，於今年10月27日深夜喺社交平台發文，指控男方喺交往期間先後同21名女性保持不正當關係或露骨曖昧，並公開大量對話截圖同轉帳紀錄，全網圍觀痛斥渣男。
最要命係，事件爆發剛好喺兩家正式見家長前夕。據女方長文，2026年10月下旬男方父母專程由外地嚟杭州，雙方原定見面商討婚事，然會面前夕女友翻查樂仔手機，震驚發現對方同6名女性保持露骨曖昧對話、頻繁金錢往來，多年信任徹底粉碎。
據悉，兩人自2022年起喺杭州同居，一齊做自媒體，熙熙除咗係女友仲兼剪片、出差助理同管理團隊。其實2024年8月女方已發現男方同住樓上嘅女鄰居有不明不白關係，一度鬧翻但後獲原諒。
事件曝光後，樂仔喺社交平台發文道歉，承認「犯下了嚴重的原則性錯誤」，但堅稱「出軌21人」係嚴重誇大，辯稱部分對象只係未曾見面嘅線上言語曖昧，即內地俗稱嘅「口嗨」。
為求平息風波，樂仔提出方案：分期賠償50萬元人民幣（約58.8萬港元）、全額代付女方現居單位一年租金（月租28,350人民幣，一年約34萬）、外加半年每月支付2.5萬人民幣（約2.9萬港元）生活費，宣稱過去4年喺女方身上花咗唔下300萬人民幣（約353萬港元），以上總數約100萬人民幣（約117萬港元），但雙方就開銷各執一詞，引發網民熱議。女方坦言長期精神受創，需服藥控制情緒。
姣姐講多句：最恐怖唔係出軌，係出軌仲有紀錄，轉帳紀錄、對話截圖、微信暱稱，齊齊整整喺手機度排成列，仲偏偏喺見家長前一日爆。21份「賬單」擺喺未來公婆面前，仲要點見？就算口嗨，亦要口到自己手機嘅云碟度算數，最慘嘅係「口嗨」到需服用抗抑鬱藥，呢個「口嗨」代價仲大過想像。
