加州查普曼大學今個月（10月20日）公佈咗佢哋年度調查嘅2026年結果——「美國人最恐懼的事物Top 10」，呢次係第12屆。調查喺今年四月對1221名美國成年人做咗線上問卷。
Top 10嘅排名大致係咁：政治腐敗（61.1%）照例排第一，去年都係佢；美國再被捲入世界大戰（58%）排第二，由去年第六名飆升上嚟，學者話同伊朗紛爭有關係；而真正令我哋想點煙嘅位，係第三同第七。
「AI對政治的負面影響」排第三，51.9%。「AI對經濟的負面影響」排第七，49.7%。
睇清楚嗰個數字：第四名「重要的人罹患重病」係51.8%，第五名「重要的人死亡」係50.6%。即係話，美國人對AI搞壞佢哋政治制度嘅恐懼，同佢哋怕自己阿媽病咗、阿爸走咗，幾乎完全喺同一條線。你個ChatGPT可能比一紙病危通知書仲令你有壓力。
圖片：Tom Arthur／CC BY-SA 2.0／Wikimedia Commons
研究呢份報告嘅教授話，美國人不單擔心AI搞搞佢哋嘅工，仲擔心AI搞搞政治制度同經濟，舉例包括「幾可亂真嘅AI圖片」同「有人藉AI散佈不準確資訊」。教授亦話，由於用AI嘅人越來越多，未來呢種恐懼感「或許會隨時間減少」。
姣姐講多句：講真，我哋日用AI寫稿、寫圖、搜嘢嘅人，見到呢個51.9%第一反應唔係「天嚇AI真可怕」，而係「點解佢哋仲唔識用」。越用越唔怕，越驚越唔用，呢個循環大概同去鬼屋一樣——去多幾次你就習慣了。
黃姣姐整合｜頂硬上
