日本一位地下偶像 Kanapon，喺自己母國嘅舞台表演觀眾寥寥可數，幾乎冇人認識，竟喺 14 億人口嘅印度一夕爆紅，成為萬人爭睹嘅偶像新星。呢個反差，仲被日本 TBS 頻道做咗專題報導。
TBS 頻道新聞節目《情報7daysニュースキャスター》最近介紹咗 Kanapon。喺日本，佢嘅舞台又簡陋又冷清；但喺印度，佢可以登上大舞台，被滿場粉絲團團圍住，有人甚至專門為佢遠道而來。
Kanapon 自己話，佢由細睇緊早安少女組同松浦亞彌，好憧憬，於是去試鏡，25 歲先通過，加入咗一個約 30 人嘅偶像團體，綠色係佢嘅代表色。但之後成員一個個退團，「最後連經紀公司都消滅了」，剩佢一個人，所有活動都要自己搞。
就喺佢想放棄嗰陣，偶然去咗菲律賓，有好多陌生人同佢講「你好可愛」。佢覺得或許自己喺國外有市場，於是開始向世界各地嘅活動毛遂自薦。直至 2023 年，印度一場活動同意佢登台，佢嘅印度之途就由呢一刻開始。
點解印度人係咁鍾意佢？受訪粉絲話，因為佢會跳《我推的孩子》星野愛之類嘅動漫歌，「簡直好似由動畫入面走出來」，而佢哋好多都係第一次親眼見到日本偶像——因為日本根本冇偶像經營印度市場，所以 Kanapon 就咁一口氣食下 14 億人口嘅紅利。
姣姐講多句：通常藝人係先喺母國爆紅先出口，Kanapon 係一個完全相反嘅例子——出口先至紅、母國卻冇人識。呢個「出口轉內銷」嘅反差，係呢件事最有趣嘅地方。而 Kanapon 自己最感動嘅，係嗰幾個跟緊佢嘅日本粉絲：「要説是替我的偶像生涯延續生命也可以。我覺得當初沒有放棄真是太好了。」
黃姣姐整合｜頂硬上
