日本三重縣鳥羽水族館喺週四（11月5日）宣佈，館內飼養嘅18歲雌性海獺「Kira」因呼吸衰竭導致心肺功能停止，喺當日上午10時40分离世。
Kira呢隻海獺點解咁有名？佢以動作敏捷、快速揮手同拍手聞名，更常喺閉館前同同伴May一齊幫飼養員收拾道具，可愛模樣俘虜咗無數網民同遊客。水族館甚至喺佢展區架設鏡頭，做24小時網上直播，將呢隻海獺包裝成一個「明星」。
水族館表示，Kira由今年8月起健康狀況轉差，出現雙腿無力同體重急劇下降等症狀，館方安排獸醫同飼養員密切跟進，並喺11月4日暫停對外出展，讓佢專心治療。惟至5日上午約7時，Kira突然出現痙攣，被緊急送往治療室進行保温、輸氧及藥物急救，可惜最終不治，期間飼養員同同伴May均陪伴喺佢身旁。
Kira於2008年4月出生於和歌山縣白濱町嘅「冒險大世界」，2021年3月遷至鳥羽水族館。
圖片：Miyuki Meinaka／CC BY-SA 4.0／Wikimedia Commons
呢個並非日本圈養海獺首次出現空缺。繼福岡海洋世界「海之中道」嘅雄性海獺Riro於2025年1月離世後，全日本圈養海獺已只剩鳥羽水族館兩隻。隨著Kira病逝，22歲嘅May成為全日本最後一隻人工圈養海獺。
資料顯示，日本水族館曾流行圈養海獺，數量於1994年達到頂峰，當時全國28家水族館合共飼養咗122隻。但隨著海獺被列入瀕危動物名錄、多地禁止捕捉野生個體，加上繁育同護理難度增加，圈養數量日漸減少。
硬蕉抽兩句：當一隻動物因為一個「拍手」動作被架喺鏡頭下面24小時直播，佢嘅觀眾便唔再係研究對象，而係流量指標。Kira生前紅遍全網嘅，正正就係呢種「明星化」。今日呢套直播設備對住嘅，唔過係一個空蕩蕩嘅展缸，而全日本最後一隻圈養海獺May，仲喺度獨力撐住一個已經快冇人睇嘅行當。
硬蕉哥整合｜頂硬上
