日本沖繩電視台琉球朝日放送（QAB）一名今年4月先入職嘅新人女記者中村月夢，日前為報導當地酒駕問題，親身上陣參與警方喺豐見城市主辦嘅「酒駕體驗教室」。據日媒《ピンズバNEWS》報道，沖繩傷亡交通事故入面酒駕比例連續5年高居日本全國第一，電視台新聞節目《CATCHY》就安排佢實地實測。
為讓呼氣酒精濃度達到日本「醉酒駕駛」法定標準（每公升0.5毫克），中村喺短短1小時內灌下4罐啤酒加4杯紅酒，數值直接飆到酒駕基準值嘅3.3倍。呢陣時佢臉頰微紅、口齒清晰，仲對住鏡頭笑住話：「我現在只有少少微醺，平時車技不錯，很有信心！」，上車前仲宣稱「已經準備萬全」，完全睇唔出啱啱灌咗成疊酒精落肚。
不過呢份自信只撐咗幾秒。入封閉賽道測試避開路面障礙物時，酒精即刻顯現：面對躺在路面嘅模擬假人，佢反應變慢、完全煞車不及，直接迎頭輾咗過去。車內鏡頭完整記錄到撞倒假人嗰一刻，佢慌亂尖叫、雙手左右狂扭方向盤、表情徹底失控。事後佢心有餘悸地坦白：「本來對駕駛幾有自信，教官事前也提醒要踩煞車，但那一刻真的連左右都分不清……深刻感受到醉駕有多可怕。」
呢段20秒片段喺社交平台X曝光後，短短幾日突破4500萬次瀏覽，電視台YouTube官方影片亦衝破182萬次點擊。網民除了驚佢「1小時能喝那麼多，酒量太強了」，仲狂截佢撞假人嗰一刻嘅「顏藝大爆發」，笑指「分不清是真慌還是演的，但那副『這下大鑊了』的表情真的太好笑」，更封佢做「隱世酒豪」。
姣姐講多句：試車試到社死，呢單嘢就係最真實嘅「實測」。最驚嘅係佢真係「酒量好」嘅同時仲以為自己「車技好」，兩樣「自信」加埋先係真嘅致命組合。喺香港喝醉開車被捉，除咗扣分扣錢仲要坐監，「隱世酒豪」真係最好留喺杯企度，唔好留喺駕駛座。
黃姣姐整合｜頂硬上
