日本有一位穿著地雷系穿搭嘅少女，網名「Hunter-chan」（ハンターちゃん），今年23歲，佢嘅真實身分令整個日本網絡瞠目：現役獵鹿專家。佢唔單止考到日本獵人執照，仲喺東京開咗一間叫「Animalia」嘅野味概念Café，鹿肉壽喜燒、烤蝦夷鹿肉一樣都有。佢透過《ABEMA Prime》節目、Instagram 同 TikTok 公開發片開槍獵鹿，瞬間爆紅，同時亦招來「將來一定不得好死」嘅排山倒海罵聲。
佢話自己細個就鍾意隨家人進山採山菜，係個十足「野味愛好者」。有獵人朋友見佢咁鍾意食鹿肉，就話「不如你考個獵人執照啦」，佢就真係考晒「狩獵免許」同「獵銃許可」，成為現役獵人。
《ABEMA Prime》製作組曾喺北海道宗谷地區跟拍佢實地狩獵。Hunter-chan 手持半步槍，喺強風同惡劣天氣下搜尋幾小時，終擊中一頭重達100公斤嘅大鹿。佢話扣動扳機時最重要係「必須一槍命中致死部位」，射偏令動物受傷逃跑，就係對牠嘅殘忍；快速無痛完成，先係真正尊重生命。佢仲話親手由鹿體內取出心臟等器官再食落，令佢「更懂得感恩每一餐」。
點解一定殺鹿？Hunter-chan 指北海道野生蝦夷鹿數目已漲至近歷史新高73萬頭，雌鹿1歲即能生育、無狼等天敵，大量啃食牧草、剝樹皮、吃光高山植物，對農業同森林構成毀滅性破壞。更殘酷係全日本被捕獲野生鹿中只有約10%能成功加工食用，其餘9成因無處理設施（整個稚內市只有1間解體場）同高昂運費，直接被掩埋或焚燒。
面對「殺四腳動物將來不得好死」嘅網民攻擊，Hunter-chan 反擊話：城市人喺超市買包裝好嘅豬肉牛肉，不過係「把殺生過程外判」，「躲在超市背後便以為自己冇傷害過生命」。佢又話，做「鍵盤戰士」之前，不如先走進大自然睇清楚真實世界。
