日本高中生實測500種拍手方式獨創6步驟「大雷霆擊」

拍手係再普通不過嘅動作，但茨城縣立並木中等教育學校6年級（約港式中六）嘅劍道社社員中川航，就把它當成一門可以實測嘅科學。

原來去年6月，中川航帶住約10名隊友打縣大賽，發現對面嘅家長應援團掌聲響亮，聲量足足係自己隊嘅3倍以上。自己明明已經盡力拍，聲都冇人哋大，令佢萌生研究「最強拍手」嘅念頭，佢自己係咁講：「在拍手這件事上，我絕對不想輸給任何人。」

咁係點做？佢用手機嘅音量測量App，反覆測試咗大約500種拍手模式，搞咗約4個月，去年10月揾到自認最響嘅方法，將佢命名為「大雷霆擊」（Big Thunder Shot），聲量可以高達117分貝。

最得意係要再現呢招，佢有一套嚴謹嘅6步驟：第一步，拍前先做一遍日式廣播體操放鬆全身；第二步，喺掌心塗1克NIVEA乳霜，填補皮膚紋理做到「氣密效果」；第三步，手肘要準確彎30度，佢話呢個係兼顧速度同撞擊力嘅「黃金角度」；第四步，雙手掌心微彎形成「密閉空腔」，瞬間封住一團空氣；第五步，單膝跪地，佢形容「簡直就係浪漫求婚時嘅標準姿勢」；第六步，深呼吸、瞪大雙眼，全力一擊。

呢套方法論喺去年12月嘅校內探究成果發表競賽攞咗金賞。佢得獎後話，喺呢個「只要依賴AI就能立刻得到答案嘅時代」，能靠自己嘅力量揾到覺得有趣嘅事物嘅答案，係非常寶貴嘅經驗。