韓國一間無人雪糕店近日發生一宗離譜事。一名女子進店後，為替自己手機充電，竟擅自拔掉雪糕冷凍櫃嘅電源插頭，插上自己的充電器，仲將手機放喺冷凍櫃上方充電。充完電，佢冇插返個插頭，即行即走。

店主週一喺社交媒體曝光事件，並把監視器畫面截圖貼喺店內。由於冷凍櫃長時間失電，整櫃雪糕全部融化報廢，店主忍痛將整櫃丟棄，承受唔少營業損失，並表示已着手以妨礙營業罪嫌提告。

為咗充部手機搞晒整櫃雪糕，呢個代價聽落好似笑話，但對店主嚟講係真金白銀。事件曝光後，韓國網民大罵呢女子缺乏基本常識，有人指「這是盜竊、妨礙商業活動和財產損失」，有人話「希望他們被抓到並受到懲罰」。

無人商店喺韓國日漸普及，相關管理同治安問題都逐步受到關注。韓國國民權益委員會統計，由2022年4月至2025年3月嘅3年間，共接獲2748件與無人商店有關嘅民眾申訴，主要包括商品失竊、設備損壞、食品衞生及設施管理問題。

硬蕉抽兩句：手機冇電係小事，拔別人的雪櫃插頭係大錯。為咗「方便」而犧牲一家店嘅生計，呢個操作真係「凍」到透心寒——雪糕溶晒，人心都無咗。

硬蕉哥整合｜頂硬上