日本一名40歲男子，結婚11年都唔知岳父過去係黑道；知道真相，係喺處理岳父遺體嗰陣。

事件近日經日媒《日刊SPA》刊出，主角化名「若山宏司」，結婚對象出自單親家庭。岳父平時「總係笑咪咪」，每年行去屋企食一兩次飯，若山一直當佢就係普通温和長輩。

原來岳父早喺妻子小學時已退出組織，但此前曾數度入獄，最後一次入獄期間，主動與妻子母親分開；退出後經熟人介紹，入咗一間建設公司，做到過世前幾年先退休，退出組織已超過25年。若山話，佢喺公司認真工作、受同事信賴，「完全看不出來曾經是黑道」。

但真正令若山「感受到」岳父身分嘅，係葬禮當日。疫情期間佢本以為只有親友到場，未計到會場陸續出現近20名外表兇悍嘅男子。若山無法確認佢哋當時係否仍係組織成員，但從互動同背景推測，應該都係岳父組織時期認識嘅人。

呢批人每人只停留約10分鐘，儀式開始前已離開。若山想挽留，一名與岳父年紀相仿嘅男咗句：「像我這樣的人待太久，反而會造成你們困擾。」

更誇張係帛金。平常日本同事、朋友過世，香奠約5000至1萬日圓；但呢批人幾乎每位包5萬至10萬日圓，有人給得更多，係平時水準近10倍。若山同妻子都對金額感到驚訝。

回想過去，若山都想起兩筆厚禮：當年婚事，岳父預先送嚟50萬日圓（約2.4萬港元）紅包，佢自稱「只能做到這樣」，又話女兒細個食咗好多苦；孩子出世，又再包50萬。佢承認，當時對經濟幫助好大。

若山話，雖然初時驚訝，但「那畢竟都是過去的事情」，喺佢眼中岳父始終係名温柔長輩、疼孫女嘅爺爺。妻子與岳母早前已為隱瞞一事向佢道歉。

硬蕉抽兩句：一個人在建設公司認真做完幾十年，受同事信賴，笑臉送完每一單，直到身後先有20個凶臉男同時間「結單」。

江湖嘅規矩，原來真係寫喺背，唔使掛喺嘴。

硬蕉哥整合｜頂硬上