日本ABC電視台嘅綜藝節目「探偵！ナイトスクープ」專誠幫人解決各種疑難雜症。最近節目收到一位45歲主婦野村梓嘅來信，想替自己9歲兒子紘，問《無敵鐵金剛》入面嗰隻同名機器人究竟點解當初會咁設計——由資深漫畫家永井豪喺1972年開始連載，同年開播電視動畫。
睇嚟就係一位老母親，想搞清楚自己個仔點解咁沉迷一部幾十年老嘅作品。一踏進野村家，到處擺滿無敵鐵金剛模型、周邊，仲有紘自己打造嘅作品；佢仲自製咗永井豪作品年表，除咗《無敵鐵金剛》仲鍾意《惡魔人》，話「畫風有魄力，故事有張力」。不過比較色嘅作品，目前被老媽禁止閲讀。
紘最好奇嘅，係《無敵鐵金剛》點解會同現代機器人設計差咁多。節目於是帶佢去永井豪設立嘅漫畫公司「ダイナミック・プロダクション」參觀，未參觀到一半，永井豪老師竟然本人出場，紘嚇到整個人僵住。
面對個細路仔嘅提問，永井豪就坦白話：「我當時構想可乘坐嘅機器人時，就自然浮現咗呢個樣，完全係靈光一閃，自己都唔知讀者接唔接受，但既然想到就係想到，照畫下啦！」不過佢又補充，後來反覆諗返，可能係自己愛睇職業摔角嘅關係，所以呢個「靈光」先會出現。
最後永井豪聽到紘話將來想當漫畫家、入佢公司，就給佢建議：「唔好完全模仿誰嘅作品，要將漫畫以外嘅嘢化為屬於自己嘅嘢，譬如多看電影、多運動，如此一來你一定可以實現夢想。」紘聽完就答：「請老師一定要長命百歲！」
姣姐講多句：一部1972年嘅作品，照樣可以養大一個2026年嘅死忠粉絲，仲自製年表、夢想入老師公司，呢種ACG傳承勁過你排廿年輪候嘅嘢。9歲就自製老師作品年表，仲被老媽收住嗰本「比較色」嘅，究竟係邊個嘅問題？
黃姣姐整合｜頂硬上
