今個月日本一位YouTuber做咗件好多人睇到瞓覺都想坐起身嘅事：佢帶住自己3歲同5歲嘅兩個仔女，去咗阿富汗同伊拉克庫爾德斯坦地區「打卡」。呢兩個地方，日本外務省一直掛住最高4級旅遊警告，隨時可能有恐襲、綁架或者交通中斷而受困。
事主叫Yuri，經營「有毅力的Yuri母子行」頻道。喺Threads上，佢上載同兩個仔女喺當地嘅照片，配文寫住當地居民友善、「今天也很和平」，甚至話當地「治安好到讓人吃驚，甚至比日本還安全」。
日本網民見到即發嬲，批評佢「把孩子當作賺流量的籌碼」，指萬一喺戰亂地區出事，要動用龐大公帑同外交資源做跨國救援。Yuri面對質疑冇半點收聲，反過去話外務省嘅旅遊警示「資訊根本不可靠，落差大到讓人感動落淚」，仲鼓吹網友親身去當地看看。
日本外務省證實已接獲多宗投訴，並已通報當地使館密切監察。官腔話講得好好：「自己碰巧平安無事，絕不等於整個地區安全」，並提醒過去不乏創作者為博眼球去冷門險境險些遇害嘅案例，呼籲唔好拿毫無防衞能力的兒童生命開玩笑。
10月18日，Yuri稱已安全回國，但佢冇覺得自己有錯，仲話：「我不是為了社交頻道或YouTube而旅行，我活着就是為了旅行！關於阿富汗的影片計劃本週發布！我要徹底打破那些刻板印象。」
硬蕉抽兩句
呢位姐姐同政府嘅最高級警告「撞正」，唔單止冇避開，仲帶埋兩個幼女入場，事後仲話安全「比日本還高」。個邏輯就好似有啲人攞到政府發風球警告，仲帶埋全職去行山。外務省嘅回應係冷到冇温度：你平安無事，唔代表個地區平安。呢位姐打算呢週再發條片，我哋就等等睇佢點樣「徹底打破刻板印象」啦。
