講起身去日本旅行，點神社請御守呢樣嘢，相信好多人都有做過。有嘅人書包掛滿御守，成個好似 Christmas tree 咁，好有畫面感。坊間一直有個傳説：「同時戴多個御守會令神仙爭風呷醋、互相衝突。」呢個迷思有冇根據？現役宮司出嚟同你講清楚。
現年 44 歲嘅狩野英孝，早於 2014 年考獲神職資格，近年更繼承家業，擔任宮城縣櫻田山神社第 39 代宮司。佢同時係搞笑藝人，日前作客諧星組合「三明治人」主持嘅廣播節目，被問及呢個話題。
節目主持富澤岳史提到身邊朋友的常見疑問：「小朋友的書包上足足掛了大概20個御守。經常聽人講掛得多神仙會打架，到底是不是真的？」
狩野英孝即時闢謠：「佛祖那邊我就不清楚了，但以神道教的神仙來説，基本上是完全不會發生打架這種事的。」佢笑指島根縣嘅出雲大社每年都有「神在月」，全日本神明齊聚一堂開會，「神明哪有大家想像中那麼小氣。」
最精彩嘅部分嚟喇。狩野英孝補充，如果睇《古事記》呢類典籍，神明彼此之間其實會吵架、會向人類惡作劇：「祂們會談戀愛、會捉弄人，有時甚至還會在稻田裡小便。」主持聽完都驚訝：「連這種事都會做？聽起來根本和人類沒太大分別。」
佢又話，日本神道教屬「八百萬神」多神體系，各神社神明各司其職，同時戴健康、學業或交通安全御守，只會有累加效果，唔會削弱庇佑。
供奉稻荷大神嘅稻荷神社喺官方網站「常見問題」中亦就同一迷思給出正式答案：信眾同時佩戴多個神社御守，神明之間不會發生爭執，各自職能各異，只要對每位神明心存感謝與敬意即可。
至於狩野英孝講「佛祖那邊不清楚」，日本茨城縣日蓮宗寺院「九識靈斷一心寺」僧侶喺專欄中拆解，表示「戴得多會令神佛起衝突」純屬毫無根據嘅民間俗説。僧侶又提醒，御守嘅本質從來不在於數量多寡，最重要嘅係信眾雙手合十祈願時嘅心態與虔誠。
姣姐講多句
最搞笑嘅係一個現役宮司出嚟同你講神明會喺稻田小解，呢個反差本身就夠抵笑。最正經嘅神職人員講出最不正經嘅神明日常，聽完真係會覺得：神明都幾人性化，都唔使太嚴肅。下次去日本點神社，御守放心掛，數目隨你意，神明唔會喺你背脊鬥法。
黃姣姐整合｜頂硬上
