印度中央邦（Madhya Pradesh）10月23日下午，一名65歲男子喺租住嘅3樓露台吐口水，疑觸及架空高壓電纜，當場遭電流擊中，送院後不治。
事發喺維迪沙縣（Vidisha）甘傑巴索達鎮（Ganj Basoda）。死者係65歲泥水匠普拉布拉爾·古普塔（Prabhulal Gupta），原籍恰塔爾布爾（Chhatarpur），喺當地租住約10年。事發喺下午約1時，古普塔喺露台咀嚼含煙草嘅檳榔嚼塊「古特卡」（Gutkha），隨手向大廈外吐出，唾液疑噴濺成短暫導電液柱，接近至可引發電弧擊穿嘅距離，瞬間遭猛烈電流擊倒，全身多處嚴重燒傷。當地緊急應答系統（112）接報到場送院，惟傷重不治。
事件嘅致命點喺物理機制。電機工程專家解釋，唾液本身含水分同無機鹽電解質，具備良好導電性；當導電液柱過度接近1.1萬伏特（11kV）嘅高壓導體，足以打破空氣嘅絕緣狀態，令高壓電透過空氣直接引發「電弧放電」（Arc Flash）。呢股電流經人體導向地面，足以造成心臟驟停、神經損傷及組織碳化。
資料圖片：Pixabay
更加觸目嘅，係涉事電纜本身嘅位置。業主帕德瑪（Padma）指出，出事嘅架空電纜同變壓器長年失修，距離民居露台僅得約1至2米。街坊多年間曾屢次向邦電力部門反映危險性，要求遷移線路，惟據業主反映，當局一直迴避拖延，未見處理。事發後，甘傑巴索達警方已將案件列為非自然死亡立案調查，追究電力部門是否涉及刑事疏忽。
一個隨手嘅小動作，代價係一條命。真正令人唏噓嘅，唔係事件嘅荒誕，而係呢種「就喺你頭頂、年年有街坊上書、年年無事」嘅安全欠賬，喺最平常嘅一個瞬間收帳。
黃姣姐整合｜頂硬上
