一代洪拳宗師劉家良入室弟子、黃飛鴻第五代傳人何麥（Mark Houghton）早前離世，終年64歲。家屬在紅磡世界殯儀館設靈，多位圈中送上花牌致哀，但女兒何慈茵（Charlene）卻被指沒有現身，連花牌都不見。
何慈茵昨日（6日）首度開腔回應，指整件事因亡父的女友「Christie」而起。她原本想為父親辦一個無宗教儀式，但Christie不但獨攬大權，更不肯交出亡父身份證及所有醫學資料；她指喪禮日期係「被通知」，外國徒弟及親朋早已買好機票，她曾提議全部由自己出錢、改用自己方式悼念，均被拒絕。
最刺眼嘅，係Christie對外自稱「老婆」，稱何麥為「先夫」，以「未亡人」姿態掌權。何慈茵指兩人從未註冊結婚，查過冇結婚證書；何麥生前亦多次當面糾正，稱只是男女朋友，絕不再婚。她指Christie只係強調一齊咗33年，便自稱有權做晒所有嘢。
何慈茵又披露，Christie更對武館虎視眈眈，想以「師母」姿態帶起成個劉家班。何慈茵指自己本無意出面，但亡父一眾入室弟子私下找她開會，稱Christie對功夫唔熟、把武館當做生意，要求她盡快接手。
於是她6日在社交平台宣佈接任「嶺南黃飛鴻洪拳傳人-劉家洪拳」承繼人，成為黃飛鴻洪拳第六代傳人。她5歲開始接觸武術，14歲正式隨父拜師；何麥嘅武館現於英國、法國、德國、瑞士及佛山設有分館。
談到遺產，何慈茵稱父親冇留下多少財產，生前反而由她同媽媽經濟上支持；即使有車、快艇等非現金資產，她亦話「想要就畀佢」，唔爭。
姣姐講多句
呢單事最唔舒服嘅，唔係有人缺席喪禮，而係一個人在爸爸最親近嘅人面前，用一張唔存在嘅「老婆」身份去話事。何慈茵冇爭錢、冇攞花牌做騷，只係想按自己方法悼念爸爸——呢個立場，其實係好硬淨嘅。
