台灣三立長壽劇《戲説台灣》近日播出最新單元「地母娘娘賜蛋善惡報」，女演員林姿言喺劇中梳起傳統古裝髮型演「阿桂嬸」，但觀眾追到一半忽然「回不去」——佢嘅五官神韻，居然同韓國天團BIGBANG成員大聲（姜大聲/Daesung）有近乎99%嘅相似度。
有網民將二人製作成對比圖上傳Threads等社交平台，帖文錄得近150萬次瀏覽，喺網上瘋傳。留言區寫住「一旦看出相似就回不去了」、「不能説很像，只能説一模一樣」。
仲有網民開玩笑，懷疑林姿言係咪偷去客串BIGBANG演唱會。林姿言其後高EQ親自出爐，喺社交平台留言「認親」。佢笑稱觀眾「看一個角色能同時看到兩個人，這種事情已經是太賺了吧」，面對「偷去演唱會」嘅質疑，佢自嘲：「吼，票那麼難買我根本混不進去」，仲透露自己由國中起，就有人話大聲係佢「沒有血緣關係的哥哥」，互動相當搞笑。
呢個其實並非林姿言首次引起撞臉熱話。佢早前喺電影《陽光女子合唱團》飾演女獄警時，已經有觀眾發現佢神似大聲；今次古裝造型，令兩人嘅相似感更突出。佢本身具備中、台、英三語能力，係一位正累積作品嘅新生代演員，今次事件令佢嘅人氣隨之急升。
姣姐講多句：撞臉成日係睇到嘅事，但一個古裝台灣女人同韓國男團大哥「一人分飾兩角」，仲自認「太賺」，呢種坦蕩同自覺幽默，真係同佢嘅「沒有血緣關係嘅哥哥」都一樣抵玩。
黃姣姐整合｜頂硬上
