公屋首次審查冇去遭取消資格，男急求助網民笑爆

近日有港人在 Facebook「公屋討論區 - 香港facebook群組」發文求助：「房署早幾日月出信叫我去首次審查冇去，被人取消咗資格點算？」相信樓主緊張到打錯字，「早幾日」還是「早幾個月」搞不清楚，佢亦冇交代點解缺席，亦冇俾取消申請嘅確實日期。

帖一出即刻引爆全場，網民嘅第一反應不是同情，而係齊齊吐槽：「證明你不在乎，申請只是貪過癮」、「你唔在乎囉，唔好霸住人哋個位啦」、「要幾X唔上心同唔重視先可以係呢啲日子 no show」。更有網民懷疑佢其實長住內地，收唔到信件：「你肯定大陸有物業啦！返咗上去住，今日返落嚟見到有信先知道囉！取消咗就冇㗎啦，自己買啦」。

咁搞，仲救唔救得返？

根據房委會《公共租住房屋申請須知》第 3.1.6(a) 項，公屋申請進入詳細資格審查階段，房署會依次約見申請人及家庭成員，核實入息、資產及家庭狀況。如果申請人預知去唔到，可以透過「公屋申請電子服務」改期；但條文寫得清楚：無故缺席而冇事先通知房署，房署會視為申請人「已無意申請公屋」，並作適當處理，包括取消申請。

好消息係，申請人仍有翻身機會。按第 3.1.6(i) 項，如對取消資格有異議，可以喺房署發出通知信日期起計 2 個月內提出覆核，透過書面、親臨房署申請分組，或用「公屋申請電子服務」提交，並須附上支持覆核嘅證明文件。超期嘅話，房署原則上唔再理會，除非有「特殊情況」並能出示證明；就算提出覆核，亦唔代表一定恢復資格，最終仍由房署按個別情況決定。