拍拖快六年，準備結婚買樓，準新郎喺簽臨時買賣合約前一刻突然出聲「層樓可唔可以淨係落我名？」，女生當場收單分手。
呢個事件係本港一名地產 KOL 喺 Threads 帳號爆料，話一對喺港情侶拍拖約六年，近月開始籌備婚事，看中一個價值約 500 萬元的住宅單位。由女方家主動出 150 萬作首期，餘下款項由男生按揭，供樓 20 至 30 年，裝修行程亦由男方負責。原本一切商討完成、眼見即將簽約，男生就喺呢個時點提出「淨係落我名」。
女生最難接受嘅，唔係男友想「獨佔」物業，而係佢一直冇喺置業初期提出，直至臨近簽約先突然表態，喺帖文中反問：「如果連咁大件事都係你決定完，去到最後一刻先通知我，第時結咗婚，仲有幾多決定會係咁？」
KOL 補充，兩人過去共同租住單位接近四年，大部分租金都係男方負責；加上 20 至 30 年供款、利息加裝修，長遠計男方自認出嘅錢可能仲多於 150 萬首期，「你屋企出150萬首期，但之後供款、利息、裝修都係我一路出，如果長遠計我出嘅錢仲多，點解層樓一定要聯名？」。KOL 笑言：「唯一白做嘅，可能係帶佢哋睇咗咁多次樓嗰個 Agent。」
帖文一出喺 Threads 引起大量討論，網民反應大致倒向女方：「分得好」、「唔聯名即預咗會離婚」、「明明大家都有付出，好哋哋落晒雙方名咪得，男方條氣唔順，咪最多叫女方每個月都夾少少」、「就算咁講，都唔會改變我對佢嘅睇法，條仔真係 cheap 到震」。
法律側，社區法網（港大法律及科技研究中心營運）指，香港物業業權唔止單名同各佔一半兩項，多人共有可分聯權共有（俗稱長命契）同分權共有，後者份額唔必平均；即使一方未登記為業主，只要實際支付部分樓價，特定情況下可透過信託法律主張實益權益。而婚姻本身唔會自動令配偶取得另一方名下物業嘅一半法律業權；若日後離婚，法庭可依據香港法例第 192 章《婚姻法律程序與財產條例》考慮雙方收入、財產、婚姻持續時間等因素，按個案作出財產轉讓命令，但前提是二人係先結婚再分手，結婚前分手嘅話，就唔適用離婚財產分配機制。
姣姐講多句：男方計數計到「長遠我出得多好多」，表面合理，實際上把 150 萬首期當空氣、計到將 20 至 30 年按揭利息都攤到女方頭上，就係「計得太清楚」嘅極致。婚姻講共識，唔係講財務攤分表；唔聯名即預咗會離婚，呢句網民留言係今次個最誠實嘅註腳。
