五角大樓二月發生咗一件「小意外」：美國防長 Pete Hegseth 一直鍾意、想擺喺自己辦公室的 30 吋艾森豪威（Eisenhower）地球儀，被佢自己嘅隨員搬碎咗。
呢個地球儀據報係 1930 年代嘅無價文物，五角大樓共有兩件同類，傳為第 34 任美國總統艾森豪威當年以盟軍總司令身份部署 D-Day 時用過。
美國軍發言人透過電郵就事故向傳媒證實，指損壞發生喺「一次嘗試搬運（an attempted move）」期間，「球形部分脱離咗令其旋轉嘅金屬支架」。據悉隨員原本嫌等唔落，未叫專業搬運公司，自派人手搬運，中途失控跌落，「明顯缺乏耐性」。地球儀最終冇搬入辦公室，現正修復。
呢度先至好玩。同一事故，「國防部」——即係特朗普第二任任期改名後嘅美國國防部——後來嘅聲明急轉彎，話碎咗嘅係「艾森豪威地球儀嘅複製品（replica）」，並稱「事故總有發生，感謝冇人受傷，地球儀正修復中」，還順手嘲咗一句「《華盛頓郵報》又喺浪費時間講無關緊要嘅非新聞」。
前文「無價」，後文「複製品」，兩個講法擺埋一齊，五角大樓嘅修辭能力，大概真係值得修復。
2022 年曾有一次成功搬運艾森豪威地球儀嘅記錄，由專業搬運公司 Craters & Freighters 喺阿拉巴馬州兩軍營之間完成，公司特為設計精製保護箱，話明呢類無價文物「價值遠超金錢」。
硬蕉抽兩句：高官嘅「收藏品」同佢哋嘅「權勢」一樣，最易碎嘅從來都唔係嘢，係自己人。
硬蕉哥整合｜頂硬上
