廣州從化區屋苑「時代印象」2022年8月起交樓，至今不過4年，近日已有業主在群組統計出近300户出現強化玻璃無端自爆，涉及露台趟門、浴室窗及客廳外窗，部分更發出巨響。
好笑喺邊？管理處負責人一句「強化玻璃有千分之三自爆率，屬行業常見現象」，再加「已過保養期，發展商唔負責，業主自費」。
問題係，個屋苑約2,790户，真按千分之三計，預期爆10户左右都頂天。現300多户都爆，都叫「常見」？有網民話：「300户都自爆率也叫常見嗎？」，仲有提喺沉降變形導致玻璃受力。
住建局排查後核實已爆204塊，其中96塊仍在2年質保期內，已免費更換；108塊已過質保期，95塊業主自費搞定，剩13塊待討論。同時已拉警戒線防碎片從高樓墮下。
有業主話為防碎玻璃飛濺，已用膠紙將整幅窗封死。高層單位幾十層高的當風位，一旦徹底脱落，住户憂慮會釀成「高空飛刀」。
北京德和衡律師事務所高級合夥人吳學聯指：保養期不等於質量免責期，數字遠超自然損耗概率，若檢測證實係質量問題，過保養期發展商仍須負維修責任。
姣姐講多句
管理處「千分之三是正常」，嗰個算法同保險公司話「死亡率千分之三是正常」一樣好聽。屋苑2,790户、8.7萬塊玻璃、300户爆，個比率自己都爆晒，仲話「常見」。
交樓4年，300户玻璃自爆，發展商一句「已過保養期」。呢個就同買電水煲焗開咗，售貨員話「保用期過咗，你自己換」。
住建局話成因「涉及原材料、温差、安裝應力，現階段未斷定」。即係話，幾萬塊玻璃爆晒，佢哋話唔知點爆。
