美國新澤西州一個舊款可口可樂玻璃樽，喺大西洋水面漂流咗超過50年，近期被一名環保義工喺沿海濕地清垃圾時撿返上嚟。樽入面張泛黃紙張寫住一封「求救信」，係1973年8月由一對姊妹創作——但當中年僅9歲、口述內容嘅嗰個妹妹，已經於2017年離世。
故事要回溯回1973年。嗰陣16歲嘅愛莉森（Allison Spencer）同9歲嘅妹妹蘿莉（Laurie Blair），隨住個媽喺新澤西州大洋城（Ocean City）第二街海邊玩。姊妹兩個突發奇想，搞咗封「求救信」——妹妹雖然想像力豐富，但年紀細、字未識寫，就由佢口述情節，大個嘅愛莉森代筆寫落紙面，封入樽內拋入大西洋。
信入面充滿童趣，聲稱自己遭「一伙無情的海綿漁夫綁架，被迫在充滿鯊魚的水域中潛水採集海綿」，呼籲拾獲者立即通知家人，文末打趣落款：「你可能救了我一命！謝謝你！」
呢樽樽之後喺海邊泥濘深處沉了超過50年。直到最近，新澤西州非牟利環保機構「Tidelands Initiative」共同創辦人約翰（John Kauterman）喺清理濕地沉積垃圾時意外發現。約翰話自己喺海邊撿過唔少嘢，但呢個樽保存得特別好，透明樽身隱約見到入面泛黃嘅字。佢將信取出，照相上載社交平台尋人，網民約12小時就揾到今居密歇根州安娜堡（Ann Arbor）、年近七旬嘅愛莉森。
資料圖片：Pixabay
愛莉森見到嗰張自己當年親手寫嘅信，見到自己當年熟悉嘅筆跡，即刻熱淚盈眶。佢透露，妹妹蘿莉生前的確係個幽默鬼馬嘅人，後來曾涉足劇場同推廣工作，2017年因乳癌離世，終年52歲。愛莉森形容，呢封埋咗超過50年嘅童年惡作劇信，對佢嚟講「簡直就係天上送來的禮物」；佢仲話，如果妹妹喺天上知道呢封信喺半個世紀後重新被發現，佢一定會笑到擺唔穩。
最巧合嘅係，拾到呢樽樽嘅義工約翰，竟然同已故嘅蘿莉同月同日生。
愛莉森而家已經收到約翰寄返嘅信件原件，打算將呢張泛黃嘅手稿裝進立體展示框，永記亡妹嘅笑聲，同埋嗰段無價嘅童年回憶。
黃姣姐整合｜頂硬上
