食飯食出「神蹟」
秋風一吹，又到食蟹季節。廣東一名男子近日喺社交平台分享進食三點蟹嘅照片，掀開蟹蓋之後，內部蟹膏同組織自然交錯，居然拼出一個極似人形輪廓嘅圖案，佢驚呼：「媽媽，我真的看到holy蟹了。」
照片一出，即刻喺網上引起大熱議。網民留言「耶穌愛你！」，又話呢個係「海鮮界難得一見的奇特景象」。有人笑稱呢個造型可以放上eBay拍賣，「説不定賣到好價錢」。
姣姐講多句
講真，呢啲「巧合」其實每粒米飯都可能似個嘢，有得你睇就當有「神蹟」，冇就食飽算。重點唔係蟹蓋似乜，係你想睇乜。
食蟹7大注意事項
食蟹旺季，食物安全中心提醒7大重點：
1. 死蟹唔好買 購買大閘蟹應選擇外殼完整、有光澤及無異味嘅活蟹，死蟹容易變壞，不宜購買。
2. 生蟹放雪櫃要隔離 未能即烹應妥善包裹，用清潔容器盛載，同其他食物分開存放，防止交叉污染。
3. 醉蟹唔安全 酒精、食醋、醬油、蒜頭等調味料均無法穿透囊蚴同細菌細胞壁，必須以高温徹底烹煮。肺吸蟲感染可引致咳嗽、胸痛、咳血。
4. 蟹黃蟹膏唔好貪多 蟹黃蟹膏膽固醇較高，長期病患者尤其要節制。
5. 內臟要清除 蟹腮、蟹胃、蟹心、蟹腸需清除，唔好將所有內部組織當蟹膏食。
6. 煮熟後室温放唔過2小時 熟蟹應盡快進食，避免長時間擺放於室温。
7. 煮熟都可能有過敏 甲殼類係常見致敏物，烹煮無法消除致敏成分，出現腫脹、呼吸困難應立即求醫。
黃姣姐整合｜頂硬上
