上緊班都唔得閒，一屋人申公屋都唔使放工。呢日本港一名公屋申請人喺 Facebook 公屋討論區爆帖，話日前見咗房署主任，赫然發現保險紅利被計入每月入息，「入息超咗」、「總紅利平均除12個月，每個月多咗2千蚊，返工是固定收入，冇得變」。
一家5口加埋有5份保險紅利，有啲仲供緊、有啲已供完。樓主慨嘆當初投保純粹想「到時有個保障」，「唔報又怕佢查到」，退保又「好似唔係好抵，又唔捨得」。眼見主任只俾半年時間整理條數，佢就諗到一個「好」辦法：如果將保險轉俾親戚，「咁樣到時會不會查」？希望趕喺最後一次審查前「搓返好條數」。
帖一出，網民炸爐。有人慴佢「攞晒紅利出嚟，再借現金價值，一般可借價值9成，攞咗現金出嚟收埋，咁就掂晒啦」。但大量熟悉審查機制同法律的網民急住潑冷水，話呢啲操作「好易觸發洗錢同審查警報」、「房署對突兀財務動作極度敏感」、「轉移保單唔好搏，監都有得坐」。
原因係保險公司過户轉讓有嚴格紀錄，若審查時突然出現產權變動或無償轉讓，房署會視為「刻意轉移資產以規避審查」。有人更諗到由薪酬入手：「每個月射幾日波，請病假，等公司扣糧」、「申請停薪留職或放無薪假」，甚至「直接請老闆減人工」。
樓主苦笑回應，估計「公司直接會出通知，以後唔使返工了」，更慨嘆「老細加人工都唔敢要」。為咗一間公屋，真係要減人工，呢個大概只係香港先有。
根據《房屋條例》第26(1)(c)條，申報公屋資格時明知作出虛假陳述或隱瞞資產，一經定罪最高判罰款5萬港元及監禁6個月，相關申請即時取消。房署《入息及資產淨值計算方法和所需文件及聲明書》亦規定，不論是派發的紅利或分紅收入，所有保險所得均須清晰填報喺「入息」部分。
最妙係，當全網以為樓主無計可施時，事情突然逆轉。樓主事後向保險經紀查證，發現之前核算的巨額數字「係咁多年總數，唔係每年總數」，「如果咁樣，應該唔過，到時再度一度條數先」。一屋人由險象環生變成化險為夷。相關帖文目前已無法尋獲，不排除樓主已刪文。
姣姐講多句：為求一間公屋，要減人工、要轉保單、要請病假扣糧，呢種「上進心」放喺乜地方都係罕有。真係希望呢家人最終順順利利排到屋，唔使再為「條數」驚心驚膽。
黃姣姐整合｜頂硬上
