黃澤林上JFFT交代：「10月先同Mandy喺clean嘅情況下認識」
22歲「香港網球一哥」黃澤林（Coleman）今趟飛韓國出戰ATP首爾挑戰賽，晚上喺網台JFFT直播首度開腔，交代同陳奕迅（Eason）愛女陳康堤分手、再與譚旻萱（Mandy）拍拖嘅事。
「分手嘅時間，其實我哋九月已經分開咗。佢（康堤）提出嘅，分手原因係完全無關第三者介入。」黃澤林話同康堤有半年感情，今趟係前度自己收檔。
最關鍵嘅時間線，佢逐字咁讀：「去到10月先至同Mandy喺clean嘅情況下認識，再瞭解，然後先確立關係，中間我都係冇同上一位有任何聯絡。」即康堤9月講分手，黃澤林10月先同Mandy相識，時間隔唔到一個月，而且佢自己承認10月先同新女友「先了解再確立關係」，同早前被拍喺廣州南沙球場擁抱、去首爾做「跟得女友」嘅放閃畫面放埋一齊睇，時序緊到驚人。
黃澤林又補充自己「成日都要出去」「都需要有個人喺身邊支持我」，Mandy需要時都喺度，末句加「呢次事件之後，我唔會再回應」，希望外界給予尊重。
資料圖片：Pixabay
康堤好似已翻頁
而陳康堤一面，10月29日佢現身中環「香港美酒佳餚巡禮2026」，喺台下專心睇好友林愷鈴獻唱，自行上IG限時動態，tag晒好友帳號，附貼多隻紅心emoji。佢日前已經喺社媒自嘲「等我改咗姓康，做個瀟灑啲嘅藝術家先」。
姣姐講多句
講真，9月分手、10月認人、10月廣州球場擁抱、11月韓國直播交代，時序寫到咁緊，仲要強調「clean」，真係好睇。不過康堤咁快翻頁，去睇林愷鈴打氣，呢個態度真係值得讚。感情嘢，分開就分開，誰唔值得一個好開局？
黃姣姐整合｜頂硬上
