12月《沙丘瀚戰：第三部》快將上映，近日有網民翻出「比爾為出《沙丘》的沙蟲而增重41kg」嘅舊聞，雖係純屬虛構，但留言區仲係笑到爆：「傳別的演員我是不信，傳比爾就不一樣了」、「給他三個月，自己會吃成沙蟲」！點解呢個虛假謠言會有咁高説服力？全因基斯頓比爾（Christian Bale）真係為角色瘦過55kg、肥過100多kg，體重數字睇到嚇一跳。
最嚇人係2004年《迷魂殺陣》，比爾飾演一年冇瞓得嘅機械工，四個月內削去近29kg，瘦到皮包骨嘅55kg。佢自己講，嗰陣通常只飲咖啡，想食嘢先食隻蘋果，體力差到同劇組傾偈都攰，索性少講多演。
半年後《蝙蝠俠：俠影之謎》佢已暴返87kg，2013年《騙海豪情》仲再堆到103kg，靠甜甜圈同起司漢堡食出真肚腩，仲剃走啲頭髮扮禿。呢種「人肉橡皮」操作，真係有夠癲。
《姣姐講多句》：呢種瘦身同減肥同食靚啲就瘦冇半點關係，純純用命換；更佩服係佢唔止玩身材，玩完仲會做功課——《沽注一擲》學打重金屬鼓，《為副不仁》每日4小時特殊化妝演 Cheney，《極速傳奇：福特決戰法拉利》又再減32kg並入車手學校受訓。身材可以變，但呢班玩命演員嘅份量，要對得起先。
