閉路電視拍得清清楚楚：車主畢先生把自己部約20萬人民幣（約23.6萬港元）嘅哈雷軟尾（Softail）電單車停喺朋友店舖門口，入面處理私事。佢一入門，就有一位女士走到車旁，冇打招呼、冇問，直接抬腿跨上試坐。呢部車淨重近300公斤，對冇重車經驗嘅人來講，試坐都未必試得穩。
果然，跨上車嘅女事主明顯扶唔直車身，幾秒內連人帶車原地側翻，金屬撞擊聲「哐」一聲。畢先生聞聲趕出，赫然發現外殼、離合器總成、手把、防撞護槓、轉向燈同腳踏等位全部刮花損毀。維修中心開單：7,449人民幣（約8,789.5港元）。
報警、取證、登記，程序都齊。但女事主見到維修費，態度即刻消極，既唔商和解，都唔肯講賠償。畢先生喺遲遲冇回應嘅情況下，已將閉路電視、警方接處警紀錄同維修單據整理好，委任律師啟動民事訴訟。
圖片：Pierre André Leclercq／CC BY 4.0／Wikimedia Commons
呢單糾紛喺內地網絡曝光後，網民幾乎一面倒聲援車主。法律界人士指出，未獲授權擅自操控他人機動車輛，本身已屬民事侵權，造成嘅財產損失侵權者依法須承擔全部賠償。
姣姐講多句：路邊名車唔好擅坐，呢條係鐵則。你見路人試坐一單20萬、300公斤嘅Harley，你唔會行過去攬住佢話「我扶你」，你只會拍照貼網上睇笑話。係啊，試坐之前都問嚇價，唔係坐完再話「唔知」。
黃姣姐整合｜頂硬上
