安徽一位30歲男子（束先生），2024年初經當地婚介所介紹，前往貴州貴陽相親，同一位來自貴州畢節赫章縣的季姓女子相識。誰知相識僅3天，兩人便於同年1月29日登記結婚。

束先生自稱，前後為呢單婚姻花費高達44萬人民幣（約51.7萬港元），包括婚介費14.8萬、彩禮15.8萬，其餘係買金飾、婚宴同生活開支。他特別強調，44萬並非全數交給女方。

婚後兩人返安徽生活，同住實際不足一個月，期間頻生爭執。2024年3月15日雙方再鬧翻並報警，翌日女方離家出走。束先生懷疑遭「騙婚」，向公安報案並透過法律途徑追討款項。

赫章縣人民法院2026年5月8日判女方須返還14.8萬人民幣（約17.4萬港元），但未支持男方就金飾及婚禮開支嘅索償。束先生稱，女方曾口頭承諾會分期還款，但其後屢催不果，強制執行亦未能取回分文。

束先生指，離家後兩人仍有電話聯絡，女方曾説：「我給法院講了，我願意還錢，但是我現在沒有錢。」

為推進案件執行，赫章縣法院於2026年10月14日正式發布懸賞公告，公開徵集季姓女子有效線索，提供真實線索並成功協助執行者，可獲7,000人民幣（約8,200港元）獎勵。

姣姐講多句：講真，¥44萬買返一個尋人啟事，呢單「婚禮」嘅收尾真係罕見。相親3日就領證、彩禮婚宴齊晒，全程快過點茶，事後發現「貨不對辦」，連人帶錢玩消失。呢啲「閃婚」風險，唔係唔知。

黃姣姐整合｜頂硬上