大陸31歲男星白宇帆近日被狗仔「知名娛記蘇小五」直擊，打完球後開車接送一名女子同幼童，仲陪同佢哋去公園玩，熟練摺嬰兒車、照顧細路，畫面温馨自然，即被網民發掘，引發「隱婚生子」大討論。
有意思嘅係，佢冇跟某些藝人一樣選擇沉默裝死。事件發酵兩日後，白宇帆於10月30日無預警喺個人微博曬出一組九宮格家庭合照，照片多係湖邊倒影同林間漫步嘅剪影，刻意避開老婆同仔女嘅清晰正臉，只留「我們仨」三個字，用最乾淨俐落嘅方式公開已婚當爸，令不少粉絲又驚又喜。
有眼尖網友將女方身分指向紀宣羽，指兩人喺服役期間相識相戀，白宇帆更喺2018年未走紅時帶佢上綜藝節目《無限歌謠季》大方分享軍旅戀愛，當時已穩定交往兩年多。
不同以往偶像藝人隱婚帶起嘅負面對衝，今次大部分網友同粉絲都支持，指佢一向靠作品同實力説話（《山海情》、《開端》、《照明商店》），冇靠單身人設吸粉，結婚生子屬正常人生規劃。
姣姐講多句：娛樂圈最怕就係「人前單身撩妹、人後拖家帶口」，被爆埋先否認。白宇帆呢次既坦率又識揀角度——拍相唔露家人正臉，尊重私隱，但決唔迴避，呢種「敢認又識護」嘅態度，比幾篇小作文都強。講真，想保護家人同想面對公眾，並唔矛盾，問題只係夠唔夠誠實。
