「昌叔」陳勉良隱世水墨畫家：周星馳母親買畫收藏，罕談甘草哲學

成日喺《愛·回家之開心速遞》做大廈保安員「昌叔」嘅陳勉良，入行已經超過半個世紀，保安員、道友、小市民樣樣通，係最深入民心嘅綠葉之一。少有人知，佢喺藝術界聲名極高，本身係一位隱世水墨畫大師，曾先後喺香港、英國、澳洲同廣州開過畫展，有收藏家以10萬元買入佢嘅畫作，另一幅山水畫《野渡橫江》，多年前更被周星馳嘅母親買入收藏。佢仲曾喺TVB劇集《金裝四大才子》度做幕後代畫畫，名副其實嘅「大師級配角」。

佢日前接受YouTube頻道《會八十》訪問，揭開呢重「隱世」身家。原來當演員從來唔係佢志願，少年時見到演員濃妝抹粉，佢心生抗拒，後來只因講義氣幫同學張羅臨時演員公司，先至輾轉獲前輩黃新推薦正式簽約。

講到演戲，佢嘅心法就一個字——「淡」：演戲唔好過火，做到角色本分已經夠，切忌喧賓奪主搶去主角光芒。佢話：「應有是那麼多，就是那麼多。」佢由70年代至今一直飾演呢啲不起眼嘅綠葉角色，從沒有介意，更直言甘草演員最忌「過火搶戲」。佢曾想過爭取更極端嘅角色，但隨住年紀大，佢早將獎項同虛名看淡，學會以平常心安放每個角色。

再講回佢嘅水墨，佢小學受師長啟蒙愛上書畫，青年時一邊喺油麻地做雕刻謀生，一喺宣紙上揮毫，直到一次畫展獲外國校長青睞購畫，先至將熱愛變作謀生工具。佢話米雪、李香琴等圈中好友常到訪交流揮毫，但佢從不以此自抬身價，始終深愛筆墨創作。

佢坦言年輕時脾氣急躁，但書畫創作賦予佢撫平脾氣、檢視自我嘅空間，「做中國文化藝術嘅人，唔應該粗暴，應該要平和。」佢話提筆創作時內心會進入極其安靜嘅世界，自然會反思日常待人接物是否得體，將筆墨功夫轉化為處世嘅一面明鏡。