有男子喺社交平台發文，話當日行去銀行櫃員機（ATM）打算提款俾老母過生日，排到前面有位約40多歲、同佢年齡相若嘅阿叔，手持電話同人視像通話，仲將櫃員機畫面展示俾對方睇。樓主自稱排喺後面排到心浮氣躁，見狀怒喝：「騙案嚟㗎，行開畀我用啦」。
點知呢聲「爆粗」一喝出口，原來真係救到人。事後阿叔解釋，原來佢喺某個社交平台嘅 Marketplace 遇騙，被人老點緊，準備用信用卡透支將錢過給對方。樓主表示佢自己「發誓從來冇諗過救人，真係純粹心情唔好等到忟」，不過阿叔事後不停向佢道謝。
呢個帖一出，唔少網民大讚佢「無心插柳幫咗人，都算係做咗善事」、「積陰德就係咁簡單」，甚至有人玩「uncle help uncle」。
姣姐講多句：呢個係好典型嘅「等得發毛」式救人。如果樓主當日心情好、耐性大、就喺度等阿叔慢慢開通話，呢筆透支十有八九就冇得撳。有時英雄就係排隊排到頭痛嗰人。
大家如收到可疑電話，可用守網者網站嘅「防騙視伏器」或相關手機應用程式查核可疑號碼，有懷疑可致電防騙熱線18222。
黃姣姐整合｜頂硬上
