喺星巴克成日揀「無糖」飲品減肥控糖嘅人，有件嘢要留意。星巴克早前喺美國西雅圖聯邦法院被搞到一單集體訴訟，話佢旗下8款標榜「無糖」嘅蛋白飲品涉嫌虛假宣傳。
原來呢8款嘢係星巴克2025年9月「重返星巴克」（Back to Starbucks）餐牌推出嘅蛋白系列，包括無糖香草蛋白拿鐵、無糖焦糖蛋白拿鐵、無糖香草蛋白抹茶、無糖焦糖蛋白抹茶，加上對應嘅4款冰飲。起訴書話以特大杯（Venti，20至24安士）計，每杯含糖量可高達13至21克，熱量270至340千卡，遠遠超出「無糖」標準。
關鍵就係呢度：呢啲飲品嘅糖，其實係鮮奶自帶嘅「天然乳糖」，唔係額外人工加落去嘅。但依美國FDA規定，飲品要在包裝寫「無糖」（Sugar Free），每份（基準約12液體安士/360毫升）含糖量必須少於0.5克。21克對0.5克，唔係差咗多唔多，係差咗四十幾倍。
原告律師團隊又話，美國現約75%消費者有減糖或戒糖需求，星巴克係利用呢個健康心態搞虛假宣傳，仲未依聯邦法規標註「本產品非低熱量食品，不能用於減重」呢句警告。
星巴克唔買帳。發言人透過電郵聲明，話指控「毫無依據」，強調公司早已喺官方公告、實體餐牌、宣傳物料、官網同App，全面清晰披露咗蛋白飲品嘅營養數據、無糖選項同自訂配方，會積極應訴。賠償金額目前未定。
姣姐講多句
「無添加糖」（no added sugar）同「整杯無糖」（sugar-free）真係兩回事，唔好以為冇加糖漿就等於零糖。你換了鮮奶、植物奶或者加料，糖分照計入總量，仲可能因此大增。買飲買嘢，睇清楚整杯嘅總含糖量同分量，唔好單憑一個「無糖」標籤就放低戒心。
