康子妮（現名：康滎舫）近日上咗伍詠薇同「廿四味」成員Brian（李凱賢）主持嘅HOY節目《九運會客室 2》，大方拆解同前夫林曉峰由2002年結婚、2020年離婚嘅經歷，仲自爆咗個極速「造人」時程表，聽完真係令人啼笑皆非。
她話2002年結婚嗰陣，只同林曉峰拍咗9個月：「我哋拍咗九個月就結婚喇。跟住結婚3日，我有咗哥哥（長子）喇。跟住哥哥出咗世第三個月，就有咗細佬（孻子）喇！」即係閃婚完3日就懷孕，大仔出世後3個月又懷咗細仔，兩個仔林寶同林熙幾乎前後腳到齊。她感嘆當年太衝動：「以前後生呢，太衝動喇。即係我覺得要用啲時間去，即係大家要了解多啲。」
康子妮2020年同林曉峰正式離婚。佢話兩邊而家係「經營緊兩個小朋友」，會就升學、生活、身體狀況溝通，節日都互發message。
其實康子妮年初曾被《東週刊》直擊同一名高瘦中年男士喺太子行街、同入茶餐廳食飯，互動甜蜜。但佢本人對主持話而家只係「有個朋友好好嘅，即係我哋都好傾嘅。我覺得，我哋做朋友先囉，瞭解多啲先。」，兩個仔都知道呢位朋友嘅存在，但佢強調現階段仍係觀望。
姣姐講多句： 康子妮講到「要用啲時間去了解」嗰刻，係全場最誠實嘅一刻。呢個世界最奇怪嘅嘢，就係有啲人用9個月拍拖3日就有孕，有啲人用5年都未肯坐低。快慢唔係問題，問題係你明唔明白自己想做咩。婚姻唔係趕工，唔好將「結婚3日就有」當標準答案。
黃姣姐整合｜頂硬上
