去年播完最後集嘅澳洲長壽劇《Neighbours》，而家被兩間公司拿去「翻製」。Fremantle同美國RoseBerry Media聯手，話會用AI「掃描數十年舊集」，將素材剪成手機用嘅垂直短片，而首批鎖定嘅重點，就係Margot Robbie 2008至2011年演嘅Donna Freedman。

兩間公司聲稱呢個做法會為「停更」嘅劇集帶嚟新觀眾，並承諾所有片段都係「原始、已播過嘅畫面、對白同演出」，會有人類剪輯「審批每一階段」。

但問題就係：冇人問過入面啲人同唔同意。

34歲嘅Matt Werkmeister，13歲就入組，演過同Robbie有大量對手戲嘅Zeke Kinski，話佢完全唔知有呢個項目。佢話：「如果佢哋要用舊嘢剪成一個新微短劇，我覺得用到我哋嘅形象同聲音，包括編劇，都應該先有同意。」佢簽合約嗰陣，streaming根本都未存在。

39歲、演過Ringo Brown嘅Sam Clark更係由朋友轉帖先知。佢話唔反對「廿年前嘅嘢有第二次生命」，惟「20年前簽合約嗰陣，AI同社交網絡根本唔存在，我至而家都唔知權限嘅邊界喺邊」。

最犀利嘅就係做咗近50年音響嘅68歲Bruce Findlay，由第一集開始跟住部劇。佢嗌：「用AI將舊片段剪成短集，好似斬一幅畢加索再拼埋。我哋好辛苦先做到呢個嘢……而家佢哋將佢斬成一小件一小件，拋到空中再用AI拼返，呢個係對整個過程嘅侮辱。」

硬蕉抽兩句

將幾十年嘅群像劇，用演算法抽埋只剩一個明星，剩低嘅都係背景板，呢個嘢我哋喺別處都見過同一套邏輯：一個龐大集體嘅產品，最後嘅話語權集中喺一個人手入面，其餘人變作背景素材。

技術話「冇生成新嘢、冇改面、冇合成聲」，聽落似係好有分寸。但問題唔喺「有冇改」，而係「有冇問過人」。呢個先至係真正嘅邊界，唔係AI做做唔到。

硬蕉哥整合｜頂硬上