廣東珠海近日發生一宗令人脊背發涼嘅事件：一名12歲男童被母親獨自留在租屋單位長達數月，全靠父親每月轉帳到佢嘅兒童電話手錶，用電子支付叫外賣維生。更誇張，由於租屋單位欠繳管理費同水電費，被斷水斷電，男童甚至要行去屋苑管理處借廁所，期間仲衍生出隨地大小便嘅問題。
業主馬女士指，她於2024年6月14日同男孩母親潘女士簽訂1年期租約，月租3,300人民幣（約3,900港元）。潘女士最初帶4名孩子入住，其後帶走其他孩子，唯獨將呢名12歲男童獨留喺單位。2025年3月起潘女士停止交租，截至合約期滿及目前，累計欠租金、管理費同水電費超過7萬人民幣（約8.1萬港元）。
事件曝光後，香洲區街道辦同社區人員介入協調，男童於9月30日由母親接回照顧，政府亦已接手跟進後續就學問題。
最難解同最離譜嘅，係潘女士面對追討嘅態度。對於將孩子獨留數月，佢只係冷冷咁話「我也沒有做什麼違規或太出格的事」；面對業主追討欠款，佢更直接話「讓執行局來做就行了，我們不負責」。至於孩子後續入學問題，佢話「節後才知道」。業主馬女士表示將申請法院強制執行追討欠款。
網民反應幾乎一面倒憤怒：「這屬於遺棄罪吧，他父母為什麼沒被抓起來？」、「天吶，12歲就被棄了」；亦有部分人同情業主：「欠了2年房租都冇趕走，這房東也是太善良了」。
姣姐講多句：
呢單事唔係八卦，係正正有關兒童權益同家長責任嘅現實問題。將一個12歲嘅小朋友獨自丟喺斷水斷電嘅單位，靠一部電話手錶嘅電子支付叫外賣度日，呢個唔係「疏忽」，係系統性嘅忽視。潘女士嘅回應「沒有做什麼違規或太出格的事」，係將法律底線同道德底線完全混淆。網民有網民嘅憤怒，政府有政府嘅介入，但一個孩子經歷嘅數月孤獨同不安全感，呢個損傷唔係「節後才知道」嗰種事。
黃姣姐整合｜頂硬上
