10月9日，一段約15秒影片喺 Facebook 專頁「的士司機資訊網 Taxi」流傳，片段冇交代具體拍攝時間及地點，但畫面顯示2名交通警喺行人路包圍1名藍衣阿叔，另有1名便衣警喺私家車車頭搜證，相信係查獲有人經營白牌車。
最精彩嘅位係其中一名交通警對阿叔直言：「唔好意思，你違反香港法例，係咁多，你唔好同我講『肚餓就可以去打劫』，唔係咁樣嘅道理嚟㗎。」阿叔略操鄉音，仍堅持反駁：「我𠵱家老老實實接客做生意。」交通警最後話「收聲啦，你明就得，你同個官講」，不遠處可見其他同袍同數輛警車，影片就此結束。
影片一出，網民激讚警員「鬧得好」，留言笑爆：「肚餓就可以去打劫咩？阿Sir鬧得好」「斷正仲要大聲講自己接客」「犯法犯到佢以為自己合法一樣」。
姣姐講多句：呢句「肚餓就可以去打劫」實在係年度最毒舌嘅警員金句，講到癲佬藉口大賞都唔敢同佢比。但笑完都要講句公道話，白牌車載客真係有危險，非法載客會令私家車保險失效，出事保險公司很可能拒賠，司機除面臨最高罰款1萬元、監禁6個月及取消駕駛資格外，仲要面對乘客索償。呢位阿叔就算真係「老老實實」，老老實實犯法就係犯法，收聲真係最好。
